कोरोना लसीच्या दुसऱ्या डोससाठी जाकादेवी परिसरातील शेकडो विद्यार्थ्यांची प्रतीक्षा* *डोस उपलब्धतेसाठी उदय बने,अभय खेडेकर यांच्याकडे पालकांची आग्रही मागणी
जाकादेवी/वार्ताहर
कोरोना प्रतिबंधक लसीचे पहिले डोस जाकादेवी परिसरातील शेकडो शालेय विद्यार्थ्यांना अतिशय चांगल्या प्रकारच्या नियोजनानुसार जाकादेवी येथील प्राथमिक आरोग्य केंद्रातर्फे देण्यात आले.दुसरा डोस जाकादेवी प्राथमिक आरोग्य केंद्रात कमी प्रमाणात उपलब्ध होत आहे. या आठवड्यात दुसऱ्या डोसची कमतरता भासत असल्याने शेकडो विद्यार्थ्यांपुढे दिलेला कालावधी ओलांडून जातो की काय? असा प्रश्न विद्यार्थी व पालक यांना सतावू लागला आहे.अद्याप कोरोना लसीचा दुसरा डोस प्राथमिक आरोग्य केंद्रात पुरेसा उपलब्ध झाला नसल्याने तो विनाविलंब उपलब्ध व्हावा, यासाठी आग्रही मागणी रत्नागिरी जिल्ह्याचे धडाडीचे उपाध्यक्ष व आरोग्य विभागाचे कार्यतत्पर सभापती उदय बने तसेच रत्नागिरी पंचायत समितीचे सक्रिय सदस्य व युवा नेते अभय खेडेकर यांच्याकडे जाकादेवी परिसरातील विद्यार्थी व पालकांनी आग्रही मागणी केली आहे.
अपेक्षित कालावधीत कोरोना लसीच्या मात्रा का उपलब्ध होत नाहीत ? छोट्या शाळांतील विद्यार्थ्यांना दुसरी लस वेळेत दिली जात आहे. पण मोठ्या पटांच्या शाळांना दुसऱ्या डोससाठी एवढी प्रतिक्षा का करावी लागते? असा सवाल विचारला जात आहे. जाकादेवी प्रशालेतील सुमारे ७०० विद्यार्थी दुसऱ्या लसीच्या प्रतिक्षेत आहेत. तरी प्रशासनाने या बाबींची त्वरित दखल घेऊन विद्यार्थ्यांचे लसीकरण ठराविक कालावधीतच करावे, अशी आग्रही मागणी केली आहे. २१ फेब्रुवारी रोजी दुसरा डोस उपलब्ध झाला नाही तर दिलेला कालावधी संपुष्टात येणार आहे.पहिला डोस १० जानेवारी रोजी देण्यात आला होता.
