जेजुरीत चंपाषष्ठी निमित्त भंडारा उधळत केला खंडेरायाचा जयघोष.
लाखो भाविक खंडेरायाच्या चरणी दर्शनासाठी दाखल.
जेजुरीत चंपाषष्ठी निमित्त भंडारा उधळत केला खंडेरायाचा जयघोष ; लाखो भाविक खंडेरायाच्या चरणी दर्शनासाठी दाखल.On the occasion of Champashashti in Jejuri, Khanderaya’s cheers were raised; Lakhs of devotees flocked to visit Khanderaya’s feet.
आवाज न्यूज : जेजुरी वार्ताहर, १८ डिसेंबर.
भंडार खोबर्याच्या उधळणीमुळे संपूर्ण गडकोट आणि रस्ते पिवळ्या धम्मक भंडार्याने माखल्यामुळे जेजूरी सोन्याची झाली होती
‘येळकोट येळकोट जय मल्हार’ चा जयघोष; चंपाषष्ठीनिमित्त लाखो भाविक खंडेरायाच्या चरणी दाखल झाले होते
जेजुरी गडावर चंपाषष्टीचे औचित्य साधून रविवारी आणि आज लाखो भाविक आले होते. ‘सदांनंदाचा येळकोट’, ‘येळकोट येळकोट जय मल्हार’ च्या गजरात भंडार खोबर्याच्या उधळणीत भाविकांनी रांगा लावून कुलदैवताचे दर्शन घेतले. गडावर आणि शहरात सर्वत्र कुलधर्म कुळाचाराचे धार्मिक कार्यक्रम तसेच देवाचा जयघोष ऐकू येत होता. भंडारा खोबर्याच्या मुक्त हस्ताने करण्यात आलेल्या उधळणीमुळे संपूर्ण गडकोट भंडार्याने माखल्यामुळे सोन्याच्या जेजूरीचा भास होत होता.
आज सकाळी देवाची महापूजा, महाभिषेकानंतर बालदारीतील घट उठवण्यात आले. त्यानंतर घराघरातील ही घट उठले. देवाला वांगे भरीताचा नैवेद्य दाखवून उत्सवाचा उपवास सोडण्यात आला. दरवर्षी मार्गशीर्ष शुद्ध प्रतिपदा ते मार्गशीर्ष शुद्ध षष्ठी या कालावधीत जेजुरी गडावर चंपाषष्टी उत्सव साजरा होतो. प्रतिपदेपासून मार्तंड भैरवाने दानवांशी युद्ध सुरू केले ते सहा दिवस चालले. षष्ठीला देवाने दानवांवर विजय मिळवला. ऋषी मुनींनी चाफ्याच्या फुलांनी देवाची पूजा करून विजय दिवस साजरा केला अशी आख्यायीका असून तेव्हापासून हा उत्सव साजरा होत आहे. या सहा दिवसात राज्यातून लाखो भाविक जेजुरी गडावर येवून देवदर्शन घेत असतात. जेजूरीकर ही हा उत्सव मोठ्या उत्साहात साजरा करतात. येथील पुजारी सेवक वर्गाने विविध धार्मिक कार्यक्रमांचे आयोजन केले होते. त्याच बरोबर सलग सहा दिवस जेजुरी गडावर येणार्या भाविकांना देव संस्थान आणि मंडळाकडून दुपारचे मिष्टान्न भोजन ही देण्यात येत होते. सहा दिवसात हजारो भाविकांना अन्नदान करण्यात आले.
आज सकाळ पासूनच जेजुरीत भाविकांची मोठी गर्दी होती. जेजुरी पोलिसांनी वाहतुकीबरोबरच बंदोबस्त चोख ठेवला होता. मार्तंड देवसंस्थानचे विश्वस्त मंगेश घोणे, अड् विश्वास पानसे, अनिल सौन्दडे, अड् पांडुरंग थोरवे, डॉ.राजेंद्र खेडेकर गडकोटावर जातीने हजर राहून भाविकांच्या सोयी सुविधावर लक्ष ठेवून होते. वयोवृद्धव अपंग भाविकांसाठी गडावर आणणे व खाली पोहोचवण्यासाठी देव संस्थांकडून चार वाहनांची सोय केली होती. भाविकाकडून देव दर्शनाबरोबरच कुलधर्म कुळाचाराचे धार्मिक विधी उरकण्यात येत होते.