शरद पवार यांच्या ‘राष्ट्रवादी काँग्रेस पक्ष – शरदचंद्र पवार’ या पक्षाला नवं निवडणूक चिन्ह मिळालं आहे. निवडणूक आयोगानं ‘तुतारी फुंकणारा माणूस’ हे चिन्ह त्यांच्या पक्षाला बहाल केलं आहे. पक्षाच्या अधिकृत ट्विटर हँडलवरुन याची माहिती देण्यात आली.
"एक तुतारी द्या मज आणुनि
फुंकिन मी जी स्वप्राणाने
भेदुनि टाकिन सगळी गगने
दीर्घ जिच्या त्या किंकाळीने
अशी तुतारी द्या मजलागुनी!"“महाराष्ट्राच्या इतिहासात छत्रपती शिवरायांच्या शौर्यानं ज्या तुतारीने दिल्लीच्या तख्ताच्याही कानठळ्या बसवल्या होत्या, तीच 'तुतारी' आज निवडणूक चिन्ह… pic.twitter.com/LsgvjlWzuN
— Nationalist Congress Party – Sharadchandra Pawar (@NCPspeaks) February 22, 2024
काही दिवसापूर्वी निवडणूक आयोगाने राष्ट्रवादी पक्ष व पक्षचिन्ह घड्याळ अजित पवार गटाला बहाल करत शरद पवारांना मोठा धक्का दिला होता. त्यानंतर शरद पवार गटाने सर्वोच्च न्यायालयात धाव घेतली होती. आता सर्वोच्च न्यायालयाच्या निर्देशानंतर निवडणून आयोगाकडून शरद पवार गटाला तुतारी हे चिन्ह मिळालं आहे. शरद पवार गटाने वटवृक्ष, शिट्टी व कपबशी आदि चिन्हांचा पर्याय निवडणूक आयोगाला दिला होता. मात्र आयोगाने त्यांनी मागणी न केलेले व पर्यायात नसलेले तुतारी हे चिन्हे दिले आहे.
निवडणूक आयोगाकडून ‘तुतारी’ चिन्ह मिळाल्यानंतर राष्ट्रवादी काँग्रेस शरदचंद्र पवार पक्षाचा उद्या रायगडावर भव्य लॉन्चिंग सोहळा होणार आहे. या भव्य कार्यक्रमाच्या माध्यमातून लोकसभा निवडणुकीचं रणशिंग फुंकले जाणार आहे. नवं चिन्ह आणि पक्षाचं नाव मिळाल्यानंतर शरद पवार लोकसभा निवडणुकीसाठी रणशिंग फुंकण्याची शक्यता आहे. 
तुतारी वाजवणारा माणूस चिन्ह मिळाल्यानंतर शरद पवार गटाकडून या नवीन चिन्हाचा लॉन्चिंग सोहळा रायगटावर होणार आहे. यावेळी पक्षाचे अध्यक्ष शरद पवार यांच्यासह सर्व वरिष्ठ नेते रायगडावर उपस्थित राहणार आहेत.
काही दिवसांपूर्वी निवडणूक आयोगाने राष्ट्रवादी शरदचंद्र पवार असं नाव दिलं होतं. त्यानंतर आता पक्षाला तुतारी वाजवणारा माणूस हे चिन्ह बहाल करण्यात आलं आहे. सर्वोच्च न्यायालयाच्या निर्देशानुसार पुढील आदेशापर्यंत या पक्षाला शरदचंद्र पवार हे नाव कायम राहणार आहे.
